Sengerema yaboresha miundo mbinu ya Kilimo

Posted on: November 26th, 2018

Halmashauri  ya  Sengerema   mkoani  Mwanza  imefanikiwa  kufufua  huduma   ya josho la kuogesha mifugo   katika kata ya Kagunga lililopo  katika kijiji cha Lwenge   baada ya  kukwama  kutoa huduma hiyo kwa muda wa miaka 4 kutokana na   miundombinu ya josho hilo kuharibika . 

Akitangaza   kufufua huduma  hiyo  kaimu mkuu wa idara ya mifugo na uvuvi wa halmashauri ya Sengerema  Bwn.  Malissa  Ndugha  amesema kuwa wamerejesha huduma hiyo baada ya  serikali na wadau wengine wa maendeleo  kukarabati miundombinu  ya josho hilo na kuwataka viongozi wa serikali ya kijiji cha Lwenge kutoligeuza josho hilo  kuwa sehemu ya mtaji wao.

Naye mratibu wa  shirika la DALBERG  linalojihusisha na masuala  ya  kilimo  na mifugo  katika halmashauri za na Sengerema Bwn. Samson Erasto Misambo   akitoa  taarifa  fupi  ya  gharama  za ukarabati wa josho hilo  amesema  shirika hilo limefadhili zaidi ya milioni moja  kwa ajili ya ukarabati na wananchi wa eneo hilo wamechangia nguvu zao kwa kusomba mchanga pamoja na kokoto.

Kwa upande wao   viongozi  wa  serikali ya kijiji cha Lwenge    na  baadhi ya wafugaji wa eneo hilo wameishukru serikali kwa kurejesha huduma hiyo  kwani itawasaidia kuogesha mifugo yao na kuwakinga dhidi ya wadudu wanaoshambulia mifugo yao huku wakiahidi kuimarisha ulinzi katika josho hilo.

Aidha Josho   hilo  tayari   limeanza  kutoa huduma  ya kuogesha mifugo   katika  vijiji vya  Lwenge , Nyanchenche , Nyanzumla  na  kagunga .