MAAFISA WAANDIKISHAJI SENGEREMA WATAKIWA KUWA WABUNIFU UHAMASISHAJI DAFTARI LA WAPIGA KURA

Posted on: August 15th, 2024

Maafisa waandikishaji wasaidizi ngazi ya kata jimbo la Sengerema wametakiwa kuwa wabunifu katika uhamasishaji wa wananchi kujitokeza kushiriki kwenye zoezi la uboreshaji wa Daftari la kudumu la wapiga kura linalotarajiwa kuanza Agosti 21, 2024.

Wito huo umetolewa leo Agosti 15, 2024 na Afisa Mwandikishaji wa Jimbo la Sengerema, Binuru Shekidele akifunga mafunzo ya siku mbili kwa maafisa hao yaliyofanyika kwenye ukumbi wa Wajasiriamali uliopo mjini Sengerema.

"Mbali na njia nyingine za matangazo ya hamasa, tumieni ubunifu kuhamasisha zoezi hili, mimi nawaagiza kesho mkirudi kwenye vituo vyenu iteni viongozi wa ngazi zote kwenye maeneo yenu, lengo letu ni kufanikiwa kwenye zoezi hili lililo mbele yetu" amesisitiza Shekidele.

Katika hatua nyingine, Afisa Mwandikishaji wa Jimbo la Sengerema amewataka maafisa waandikishaji hao kuhakikisha wanafanya kazi na watu wote pasipo kuwabagua lengo ikiwa ni kufanikiwa kupata idadi kubwa ya wananchi wenye sifa za kujiandikishaji na uboreshaji wa taarifa katika zoezi hilo.

Mafunzo hayo ya siku mbili yalikuwa na lengo la kuwajengea uwezo wa zoezi la uboreshaji wa daftari la kudumu la wapiga kura maafisa waandikishaji wasaidizi ngazi ya kata.